Saturday, April 29, 2006

المستقبل لنا


مع احترامي التام لكل المجهودات التي يقوم بها الكثيرون لجعل هذا البلد حرا. فاني اختلف معهم فيما يفعلون الان .فوجهة نظري ان
التظاهر لن يحل شيء في بلد مثل مصر بلد مازال لم يخطو اي خطوة ناحية التقدم علي اي صعيد.فمازال بمصر حوالي 60% اميين .مازال هناك الكثيرين لايعلمون اي شيء غير الافلام والمسسلات التي توجه لهم عبر التليفزيون المصري او عبر الفضائيات ولكن من خلال كتاب مصريين اعتادوا ان يلعبوا علي وب عواطف ومشاعر الناس البسيطة التي لاهم لها الا ان تعبر باولادها تجاه بر الامان .السؤال هنا هوهل يتفق الجميع علي مفهوم بر الامان؟ فبر الامان من وجهة نظر المثقفين الملميين ببعض حقائق الاموروليس كلها هو الديمقراطية وحرية الصحافة واستقلال القضاء وتعدد الاحزاب اما بر الامان بالنسبة للمواطن البسيط هو توفير قوت يومه وتوفير النفقات اللازمة لتعليم اولاده ودخولهم الجامعة ليصيروا شخصيات محترمة فهو يري ان هذا سيوفر علي اولاده المشقة التي مر بها هو ذاته.وبالنسبة لبعض المواطنين الميسوريين الحال فبر الامان هو ان يبقي الوضع علي ما هو عليه حتي لا تهدد مصالحهم.اذن فهناك خلاف علي مفهوم بر الامان لذا سيظل القارب يتخبط يمينا ويسارا تبعا للاهواء و لان من يركبون القارب غير متفقين.اذن فالتظاهر لكي يكون فعالا لذا يجب ان يكون هناك توازن قوي بين جانب المتظاهريين و جانب الذين يتم التظاهر ضدهم .بالطبع نعلم جميعا ان جبهة الحكومة اقوي بكثير من جانب المتظاهرين .اذن السؤال هنا كيف يقوي جانب المتظاهريين هناك طريقين لاثالث لهم
الاول :اعمال عنف وشغب ومن وجهة نظري ارفضها رفض تام لانها اعمال همجية ولا تعبر عن قوة ولكن تعبر عن ضعف وتتيح الفرصة للمخربين من الداخل والخارج واعتقد ان الجميع يتفق ان هذا ليس في مصلحة اي فرد يعيش داخل هذا البلد.
الثاني :التوعية لكي يعرف كل مواطن ما له من حقوق وما عليه من واجبات حينها من حق كل فرد ان يقرر الحل الذي يراه سواء باستمرار الحكومة حينها او التظاهر او العصيان المدني او اي شيء يريد حينها سيكون القرار مرتكزا علي اسس ثابتة وواضحة فسيكون حينها الايمان بما يقول ويريد كل فرد اكبر بكثير من عربات ومصفحات الامن المركزي اذا كان ضد الحكومة .واكبر بكثير من الهتافات وأراء بعض الثوريين اذا كان يري المصلحة في استمرار الحكومة.ولكن ما احس به وعلي يقين منه ان في النهاية المستقبل لنا ولاولادنا اذا ربيناهم علي معرفة الحقيقة وتركهم ليتخذوا ارائهم بانفسهم ويتعودوا ان يتحملوا نتيجة قرارتهم.

15 comments:

Nouran said...

اصلا دي سياسة المشي جنب الحيط يعني الناس هتهتم بولادها اللي في الثانوية العامة ولا بموضوع القضاة مثلا ولا هيتموا بموضوع العبارة اللي التبرعات كلها موصلتلهاش انا مش قصدي منهتمش قصدي ان في ضغوط كبيرة ع المواطن المصري ودي سياسة اسمها اتلهوا بعيد عننا لحد ما نخرب البلد!!
وكل المتظاهرين هتلاقوا اغلبيتهم شباب صغير لسة معملوش اسر علشان لو عملوا اسر هيخافوا ع ولادهم وهيمشوا جنب الحيط وعلشان نغير السياسة دي لازم نربي الجيل الجديد ع الصدق والحق من غير ما يخافوا من حد غير من ربنا وبس ويبطلوا كلام الانشا

ولا انا غلطانة؟؟؟

فيها حاجة حلوة said...

نوران
انتي بتقولي لحد ما البلد تخرب هي لسه البلد مخربتش كلام الانشا هوا اللي انتي بتقوليه قولي لي هل توجد في مصر نسبة امية تصل ل 60% ام لا هل يوجد في مصر حتي الا ن ناس لا تملك حق طقه واحدة في اليوم ام لا هل يوجد ناس تهتم باولادها فقط (الثانوية العامة)وتخرب باقي الدنيا ام لا ولو ده موجود يبقي لازم اعرف السبب واحاول اعالجه مش انزل الشارع وخلاص. نزول الشارع في المظاهرات بالاعداد الموجودة حاليا لا يمثل سوي ورقة ضغط بسيطة جدا امام الاعلام العالمي وفي النهاية طالما كانت الحكومة عميلة فالمظاهرات ليس لها معني اذن يجب ان يزداد عدد المتظاهرين ولكن كيف هل هنزل الناس بالعافية لازم ينزلوا عن اقتناع وفهم لانهم لو نزلوا تابعين لاحد مش هيبقي في فرق هايعيشوا تابعين وهيزيد الفساد تاني داخل دائرة السلطة الجديدة ونظل داخل الدائرة بلا نهاية.او زي ما علاء قال نخلص بقي ونختار بين الاسلاميين او السلطة الحالية والاتنين انيل من بعض

الافغانى said...

المشكلة حلها نروح للناس البيوت ولاا نسمع السلبين المخربين البلد زيك

Unknown said...

المشكلة في ايه اللي ولادنا حيتعلموه و من مين. المشكلة ان احنا نستنى ولادنا همه اللي يعملوا التغيير بس التعليم هللي همه بيتعلمه مش حيخلي عندهم القدرة على عمل التغيير. فبالتالي احنا محتاجين نغير نظام التعليم و ده محتاج تغيير الحكومة اللي مش حتتغير لوحدها و محتاجة زقة مننا.
يا أخي بييقولوا لا تؤجل عمل اليوم هلى الغدو تقوللي أستنى ابني هو اللي يعمل.
محدش قال ان مظاهرتين فيها ناس كتير حيحل كل حاجةو بس طريق الألف ميل بيبدأ بخطوة.
لازم يبقى في جاجة تضغط على الحكومة, و طول مالحكومة بتشوف ان عساكر الأمن المركزي بيبقوا أكتر مش حتخافو لكن الناس لما تكتر أوي حتخاف أو على الاقل تقلق و تعمل للشعب حساب.
بصراحة شوف اللي بيحصل في نيبال و قوللي نسبة الأمية عندهم كام بس قدروا يعملوا ايه.

Unknown said...
This comment has been removed by a blog administrator.
bluestone said...

يا باشمهندس ..
اولا انا متفقة معاك في نقط كتيرة جدا .. وهي ان احيانا التظاهر بيكون عديم الجدوى خصوصا في ظل حالة اللامبالاة التي يمر بيها الشارع المصري وان الناس زي ما انت قلت همها الاول والاخير تتعشى النهاردة والواد يعمل الواجب والمدير مايقرفناش بكرة لما نروح الشغل متأخر وطالما بنقبض آخر الشهر يبقى كله فل ..

ولسبب آخر هو ان التظاهر بشكل عام أداة فعالة جدا ولكن في المجتمعات المحترمة المتحضرة التي يقيم حكامها وزنا لشعبها .. وهو ليس مطبق في بلادنا على الاطلاق .. فالمواطن في بلادنا تحول إلى ديكور غير مرغوب فيه وضيف تقيل ..كلامه زي عدمه واخرته معروفة

وان من يعترض ويتظاهر بينقسم امام الشعب بفعل الاعلام إلى خاين وعميل او عيل عصبي وهمجي وفاضي .. وده بالتأكيد نتيجة التسطيح الشنيع واعلام المسلسلات وثقافة كرة القدم ..

اتفق معك تماما ..

التوعية مهمة جدا .. ويجب تشكيل جمعيات من الشباب توعي الناس بحقها .. من غير ما تطالب بسقوط حكومة او تغيير رئيس .. بس تقول للناس حقكوا طالبوا بيه ..

-لكن هختلف معاك في ان التظاهر لا هدف ليه على الاطلاق .. اولا على الاقل الناس بتعرف ان فيه ولو قله مش راضية عن الاحوال ونفسها الدنيا تكون احسن ..
-تقدر تعتبر التظاهر صرخة احتجاج مكتومة تلفت نظر العالم انه مش كله تمام ياريس ولا حاجة ..
-محاولة للتعبير عن الرأي المحشور في حلوقنا من سنين ..
يا سيدي اعتبرها فش غل ... وله نتيجة ولو بسيطة .. ان ما قدرتش تقتل التنين على الاقل دست على صباعه ووجعته . ..

-قد اختلف مع من اعتقلوا في كثير من وجهات النظر .. واحيانا نجلس ونتشاجر بشان تلك الاختلافات .. ولكن من حقي وحقهم ان ادافع عنهم .. فمن يعتقل لمجرد انه قال رأيه بصراحة .. دي قمة الظلم ..

abderrahman said...

عارف يا باشمهندس..؟!
لما كنت في الجامعة - أنا سبت الجامعة من سنة - كنت بقول للشباب معايا إن المظاهرات اللي في الجامعة دي مفيهاش صدق - ليه ..؟

لإن اللي بيتظاهر عشان ناس غيره كان أولى بيه يتظاهر عشان نفسه، كان يتظاهر عشان مكان يقعد فيه في السكشن.. يتظاهر عشان تعليم أفضل.. يتظاهر عشان الكتب المتأخرة..الخ

دا رأيي
ومتنساش يا بشمهندس إن فيه ناس مرجعيتهم بتبقي ثورية، فبيبقى عندهم اهتمام كبير بتجميع البروليتارية والتظاهر بيهم من أجل الثورة .

marktwain said...

اتفق معاك وبشدة جهلالشعب هو سبب كل ما نحن فيه ولا اعنى الامية فالامية خطرها اقل بكثير من الجهل انما اعنى شغل الزفة اللى احنا عايشينه الكل بيفتي و الكل بيقول ان الحكومة غلطانه طب ياعم الحكومة غلطانه و مجلس الشعب اتزور بس هو كام واحد راح انتخب كام واحد في البلد دى بيقوم بعمل تطوعى عشانها كام واحد بيحافظ عليها ده حتى اللى عملين فيها ثورجيه عايزن اى حاجة غير مصلحة البلد والشعب .
نفسى الشعب هو اللى يبدأ بنفسه او نبدأ احنا ونعلم ولادنا واجبتهم و نعرفهم حقوقهم
حد جرب انه يحرق في دمه عشان واحد و في الاخر الواحد ده مايداش يساعده في اى حجة لا ويشتمه و يلعن ابوه .
حاول تجرب قبل ما تدافع اصل انا بعانى من المشكلة دى

change destiny said...

معاك في ان المظاهرات عادة بتقلب بظاعمال عنف و شغب لكن مش معاك في اننا نلغيها الشعب المصري محتاج يتعلم يستخدم صوته في التعبير عن اللي في مخه
و بعدين بعد اصلاح كل واحد لذاته و للي حواليه دي الحاجة الوحيدة اللي ممكن تحسسك انك بتعمل حاجة عشان تغير البلد و تحسس الحكومة انها حتقع قريب

ممكن يكون آخرتها بهدلة بس مش عالفاضي


و بعد اذنك محتاجة أقول حاجة تانية

الافغانى : اذا كنت انت مش قادر تتقبل رأي غير رظايك يبقى ازاي عليز تقنع الناس بالحرية . كل واحد فينا بيحاول يتحرك بطريقته . مين صح الله أعلم

فيها حاجة حلوة said...

مصطفي وماركتوين : احب اقولك ان ولادنا هايتعلموا منا الي احنا عايزينه وهو ازاي تكون حر
بلو ستون :شكرا علي تفهمك لما اردت قوله ولو سمحتي ارسلي لي e mail بتاعك علشان في فكرة للتوعية عندي محتاج حد
يساعدني فيها

:
عبده باشا المهم ان كل واحد يتظاهر يدرس هو هايعمل ايه بنتيجة التظاهر
change destiny
لطالما احببت ارائك وتقييمك للمواقف يعجبني تغهمك للاخر

Nouran said...

انا مش قصدي كدة يا جماعة مش قصدي نبقى سلبيين بس قصدي ان في مليون ضاغط ع المواطن المصري منها التعليم انتوا متعرفوش ان الثانوية دي مزانية لوحدها وانا كمان عارفة ان في ناس مش لاقية تاكل حتى العيش اللي بتأمر عليه ابو رده بس في مصايب كتير يعني مش سلبية مني بس انا هعمل ايه اسيب اللي ورايا واروح اتظاهر ولا الم الناس ونعمل مظاهرة الحجات دي مش بتجيب فايدة اديكوا شيفين الناس اللي اعتقلوا تضامنا مع القضاة هما عملوا مصيبة يعني علشان يتحطوا في السجن والحكومة هتلم كل المظاهرات يتحطوا في السجن ونبقى اول شعب مسجون كله ده هيبسطهم - سخافة مني انا عارفة- بس هو ده الواقع ولو عايزين حاجة تتغير لازم الحكم والحكومة تتغير يعني نعمل انقلاب زي الثروة كده ونجيب حد زي السادات وده مش موجود حاليا
بس الشئ الموكد ان ضاقت فلما استحكمت حلقتها فرجت وظننتها لم تفرج
هانت كلها ميت سنة وتتحسن

ع فكرة انا مليش في الحاجات دي خالص ووجهة نظري سودا من ناحيتها جدا علشان كده راى غبي واعذروني

شايفنكم said...

ما قاله قضاة مصر الشرفاء لشايفنكم يوم لجنة الصلاحيه


هشام بسطويسي....قال"الشعب عنده وعي كفايه وفاهم كويس ايه اللي بيحصل و فاهم ان قضية استقلال القضاء و نزاهته تهم كل مواطن.....القضيه مش قضيه قاضيين بيتحاكموا !!"

و قال ايضاً" حشود الامن...جيا تحمي النظام من الشعب"

و قال لنا الخضيري عن حشود الامن الكبيره" الحشد الامني يدل على على ان الدوله لا تفكر بالمنطق المطلوب...و ده لأنها للأسف بتفكر بعضلاتها"

و اضاف" المسأله مش خاصه بالقضاه دي قضية الشعب المصري كله"

و بعد ان تم الاعتداء على محمود حمزه كان لنا معه حوار كامل في مستشفى كليوباترا و هذا اهم ما ورد فيه

قال محمود حمزه لشايفنكم مستنكراً ما تعرض له من اهانات و ضرب" القضاء ده ايه؟ ايه رمزه؟ ..العدل طبعا..و لما يهان العدل بالطريقه دي...مش دي رساله للشعب..رساله بتقول: مش هما دول اللي بتقولوا ان هما صوتكوا" شما اشار الى وجهه المصاب و قال " اهو بالجزمه ...بالجزمه"

قال لنا ايضا محمود حمزه وهو يغالب دموعه.. " انا لما دخلت المستشفى في الطواريء...انكسرت اوي و صعبت نفسي عليا جداً..ولكن بعد ان جاءني تليفون من مواطنه تؤيدني و دعت لي لم اعد اشعر باي الم في جسدي"

و عندما اكد حمزه ان مصر في حاجه لكل شخص و كل وسيله اعلام من اجل تدعيم حركة القضاء سالناه هل اتى لك اي تليفزيون حكومي منذ اصابتك فضحك بمراراه و قال"لم يأتي اي تليفزيون حكومي بل بالعكس دا انا لما شفت التليفزيون المصري لقيت نفسي متهم"
و اضاف"و لما و صفوا اللي قام بالاعتداء ....كان ناقص يقولوا عليه مختل عقلياًًً!!!!!!!!"
و عندما سألناه عن مدى ايمانه باستقلال القضاء...قال" اكيد هيستقل القضاء الرئيس وعد بكده...هل يجوز ان رئيس الجمهوريه وهو اعلى الهيئات القضائيه يوعد ما يوفيش؟؟...مش معقول..انا مش متخيل انه مويفويش بوعده!!!"

و في نهاية حديثه وجه كلامه لرئيس مبارك قائلاً:" قانون السلطه القضائيه مش هيأثر على اي سلطه اخرى..
ارجوك ..ارجوك...انهى الازمه...لن ينهيا غيرك!!!"

عمرو عزت said...

بما إني قاعد جنب الباشمهندس في الشركة كل يوم
فاحنا مقطعين بعض نقاش طول الاسبوع

لكن و انا معدي فيه حاجات استفزتني و لازم اعلق
ماحدش يمسكني

نوران :
اهو الحل نعمل انقلاب و نجيب واحد زي السادات
انا شايف دي هي المشكلة
المشكلة ان قادة الانقلاب كانوا غير مؤمنين بالديمقراطية
سيطرة الجيش علي الدولة
الغاء الاحزاب
كل النقابات و الهيئات الشعبية بقت تابعة للدولة
حتي السادات عمل ديكور ديمقراطي
و كان من غير تاثير
و لما زهق منه عمل اعتقالات سبتمبر
حبس كل المعارضين في ملة واحدة

في الحقيقة اخر حاجة بتمناها هو الانقلاب
و اخر ناس اتمناهم هم الضباط

احنا محتاجين نتربي علي الحرية
اننا نحكم نفسنا
ندافع بحياتنا علي صناديق الانتخابات من اتحاد الطلبة لحد رئاسة الجمهورية مرورا بالنقابات
نختار اللي يحكمنا و نحاسبه و نعزله او نخليه حسب أدائه و رعايته لمصالحنا
و حتي بعد الانتخابات لازم الشعب يكون صاحي و يكون ليه تجمعاته و حركاته المستقلة عن الدولة
ممكن يثور و يوقف البلد لو المنتخبين مشيوا عكس مصالحه مش نستني انتخابات جاية زي ما حصل في فرنسا مثلا

طبعا ما فيش حد من اللي بينظم و لا بيشارك في المظاهرات بيقول ان احنا هانعمل مظاهرات كتير فتقوم البلد تتغير
اللي هيحاكم المظاهرات و الاعتصامات و الحاجات دي علي الاساس ده هو مش فاهم هي معناها ايه و وظيفتها ايه
المظاهرات اداة اعلامية : الناس تشوف و تسال و تعرف
اداة تعبير : اذا كانت الانتخابات مزروة .. عبر عن رايك بالحشد الشعبي في الشارع و لوسائل الاعلام و للعالم كله
و لو فكرة مقبولة تبقي حجم مظاهراتها تعبير عن شعبيتها
اداة تهديد: اذا الشعب واعي و منظم ممكن تكون تهديد بعصيان مدني او ثورة شعبية

الناس اللي شايفه انها حاجات مالهاش لازمة
امتي اخر مرة فكرت تحضر ندوة سياسية او نشاط في حزب ؟
مافيش حياة سياسية في مصر و المظاهرات اداة اثارة للناس انها تهتم بمصالحها العامة بانها تشترك في السياسة

الايجابية السياسية شيء ضروري لاي مجتمع حي
ان كل واحد يشوف شغله و يبدع فيه و يربي عياله كويس دي شيء مفروغ منه
بس طالما فيه مجتمع كبير كله بيتاثر ببعضه لازم يبقي فيه جزء من حياتنا نهتم فيه بشئون المجتمع ده

المصري الحر :
انا مش عارف ازاي الاخلاق موجوده في الموروث الجيني
و انا عمري ما رحت غيط و زرعت علشان تبقي اخلاقي زراعية
فيه بقايا اخلاق زراعية بتتناقل مع الاجيال ماشي
لكن ما تقولش ثقافتنا زراعية
حتي الثقافة الزراعية فيها مثابرة و جهد و عرق و انتظار
ده مش موجود دلوقتي
انا شايف الاهم نبص لحياتنا اللي قدامنا
احنا بنعمل ايه دلوقتي
و ما نحتقرش اي شيء و لو صغير
المدونات و الانترنت افادت كتير في توعية الناس و زيادة فاعليتهم السياسية
و ممكن تبدا مناضل اليكتروني و بعدين تتكسف و تنزل الشارع

المهم نبدأ
مش علشان التغيير هيبقي قريب
بس علشان ميتأخرش كتير

Leonardo said...

عموما هاطمّنك بس على نقطه إن معظم الناس مالهاش دعوه ومشغولين فى حياتهم والمسلسلات والأفلام والحاجات دى
ده الواقع لنسبه كبيره فعلا بس مش لمده طويله
الوضع بدأ يتغير
لأن الفساد الاقتصادى والسرقات المهوله بدأ يظهر تأثيرها على الناس العاديه فى حياتهم العاديه
غلو أسعار السلع المتزايد
خصخصة المرافق والخدمات
البطاله طبعا

كل ده بيخلى حالة الناس تسوء يوم بعد يوم
ولما يحاولوا يفهموا اللى بيحصل أو يغيّروه
بيصطدموا بالفساد السياسى والاجتماعى

ومش هيبقى فاضل غير الثوره
سواء كانت سلميه
أو حتى مسلّحه نظرا للغباء الواضح للداخليه

لغز الحياة said...

التظاهر هو نوع من انواع الايجابية وحق لكل مواطن فى التعبير عن راية حتى وان لم يثمر هذا التظاهر بنتيجة
ولكنى لست مع اعمال التخريب والتدمير والعنف