Monday, April 17, 2006

نحن السبب في ما وصل عن الاسلام للاخرين


بالامس دخلت علي بلوج (Dancing in the rain)وكانت تسرد ما حدث بالاسكندريةوعن حوارها مع احد اصدقاءها بالكلية وعن رايهم بما حدث وعن استغرابها الشديد من رد فعل اصدقائها المسلمين تجاه ما حدث للاخوة المسيحيين المصريين,واتهمها الكثيرين بعدم غيرتها علي دينها
لذا فهناك موقف كان قد حدث لي لقد اعتدنا كأسرة ان نتجمع في بيت جدتي كل يوم جمعة ونتحدث في كل امور الدنيا التي حدثت طوال الاسبوع من احداث سياسية ورياضية واقتصادية وكل ما يمس اي مواطن مصري سواء من قريب او بعيد.فكان حديثي مع اخوالي يمثل لي خطبة الجمعة التي طالما حلمت ان احضرها في المسجد.خطبة تناقش مشاكل المجتمع الذي نعيش فيه.وحدث ما حدث من رسومات مسيئة للرسول
انا :وسالت خالي ياتري امام المسجد اتكلم في ايه
خالي :هو في غير موضوع الدانمارك
انا:بس الناس مزوداها حبتين
فتدخل ابن خالتي(عمرو) وهو دكتور عمره 33 عام وغير متزوج وقال
عمرو:انتي عايز الناس تعمل ايه
انا:تعمل الصح وتشوف ايه السبب
عمرو :وايه السبب بقي يا عم
انا :السبب ان احنا كاعرب صورتنا بره زبالة
عمرو:زبالة هما كده نجحوا انهم يهزوا اسلامك وثقتك بنفسك
انا :ليه ياعم الناس اللي بره دي هاتعرف الاسلام منين
مفيش رسول خلاص يبقي هيعرفوا الاسلام من القران والسنة وعدم وصول القران والسنة بصورة صحيحة للغرب هو نتاج تقصير شديد منا
يبقي ناقص المسلمين الذين يعيشون في الغرب فهم الاسلام الذي يسير علي قدميه وطبعا الصورة معروفة فالمسلمين في الغرب منقسمين الي ثلاثة انواع
الاول:عرب سافروا هاربين ومتسللين وطبعا صورتهم زي الزفت
الثاني:متطرفين في فكرهم سواء تطرف ديني او تطرف في تعاملهم مع الحياة من(قمار ودعارة وعيرها......)
الثالث :وهم القلة التي سافرت بطريقة شرعية وتبذل ضعف المجهود لتثبت انها ليست لها علاقة باي نوعمن النوعين الاخرين
خالي :ياعني انتي عايزنا نسكت
انا :لا لازم نحرق اعلام ونكسر سفارات ونقاطع الجبنة لا فعلا رجالة
عمرو :ايه الحل يعني
انا:الحل اننا نفهم دينا كويس ونفهم ان احنا في مشكلة ناجمة عن ضعف واستهتار وكسل وفساد عربي يجب ان نعلم انه قد ان الاوان ان نعمل ونجتهد انتقدم باوطاننا العربية
عمرو:كلكم بتقولوا كده ولما بتمسكوا مابتعملوش حاجة
انا:انتابني غضب وانت عملت ايه ياسيدي
عمرو: في سخرية كل واحد عارف هو بيعمل ايه
المقصود ان احنا بننفعل وخلاص تجاه اي موقف يثبت لنا اننا مازلنا قادرين علي ان نتحكم بالامور ولو حتي بالكذب والدليل فليقل لي احد الان هل استمرت المقاطعة في دول الخليج اكيد لا لان الي بيخون اخواته العرب ويضع قواعد امريكية داخل اراضيه لايستطيع حتي ان يواجه نملةوليس دولة .
بالنسبة لما حدث بالاسكندرية فاني ساقول اني كنت في مدرسة يمتلكها مسيحير وهو استاذ (منير) وكانت تدرس لي مس (حنان ) وهي مسيحية ايضا .وكان لي اصدقاء في ابتدائي و اعدادي وثانوي مازلنا علي اتصال حتي الان.وهم(ابرام وجون ومايكل)اما فيالكلية فكان معي (مجدي)وفضلته علي احد اصدقائي ليشارك معي في مشروع التخرج.وفي العمل فهناك صديقي (ماجد)الذي تربتطني به علاقة قوية اسف لكل هذا السرد لكني والله حتي الان لا اعرف كيف يستطيع اي فرد مصري ان يفرق في التعامل بين مسلم ومسيحي وليس كيف يستطيع ان يقتل .هل امرنا ديننا بقتل الامنيين ابناء نفس الوطن .الم يامرنا ديننا باحترام حرية الدين .بسبب كل هذا اريد ان يتوقف اي فرد قبل ان يقدم علي اي رد فعل حتي ولو كان بداخله عليه ان يفكر من صاحب المصلحة فيما يحدث بين الحين والاخر بين المسلمين والمسيحين فهناك مقولة تقول (فرق تسد) فمن هو صاحب المصلحة في الاستمرار علينا ان نفكر ولو للحظات,
كل عام والاخوة المسيحين بخير وامنين داخل مصر
علي فكرة لسه دلوقت عارف انهم اختاروا الخرج( سبيلبرج ) ليخرج خفلي الافتتاح والختام للدورة الاوليمبية القادمة شوفتوا الاعلام بياثر ازاي بس مين يفهم ومين يحس.انجدنا يارب

6 comments:

shortcut said...

قليل اوي فاهمين كل اللي انت بتقوله
قليل العاقل
انت ممكن تعمل حاجة :
حاول تدور علي كل الايات القرانية و الاحاديث اللي بتبن التسامح و كيفية التعامل مع البشر كافة و تنشرها
اكيد حيكون ليها تاثير

change destiny said...

أولا : شكرا جزيلا
ثانيا : ربنا كبير بس لا يغير الله ما بقوم حتى يغيروا ما بأنفسهم
المسألة مش مسألة تصليح الصورة قدام الغرب . نصلح الصورة قدام نفسنا الأول و ساعتها يبقى عندنا جهاز اعلامي يقدر يوصل للغرب وجهات نظرنا
ثالثا : متيأسش من عمرو عشان الحوار هو الأمل . و لو بطلت تتكلم يبقى مستحيل حاجة تتصلح
ملحوظة : مش عارفة في ثالثا كنت بكلمك ولا بكلمك نفسي :)

radwa osama said...

معلش هقول لك نكته ماشيه في البلد اليومين دول :
ليه الرسول وصي علي سابع جار
لان السته اللي قبله نصاري
شوفت الهم اللي احنا فيه

karakib said...

يا جماعه انا مسيحي 000 عارف و متأكد انه اغلبيه المثقفين و الناس المحترمه صعب اوي تنتشر ما بينهم ثقافه عدم قبول الاخر 000 المشكله مش مشكله واحد ضرب في كنائس الموضوع اكبر بكتير احنا امام وطن ينهار !! ليه الناس ما بتقراش ؟؟ ليه الناس مش عايزه تشوف نضافه ؟؟ ليه مافيش حمام فالشارع ؟؟ اعتقد دي اقل حقوقي !! عايز اقضي حاجتي البيولوجيه في مكان نضيف برا البيت لو اتزنقت !!! ليه ؟؟ ليه مافيش شغل ؟؟ ليه ؟؟؟ اللي عمل كده مش مختل ده ضحيه مجتمع غبي تركه حتي وصل الي ما وصل اليه 000 الاهم من انه البوليس يحقق و البيانات تندد 00 الاهم من كل ده المشاكل اللي فالمجتمع تتحل مشاكل كتير تحتاج لصفحات لسردها !!
انتوك

voice of love said...

بوست فى الجون

Me2nour said...

كلام رائع.. بس ياريت نلاقي اللي يفهم